لاہور : آئی جی پنجاب راؤ سردار علی نے مزید کام کرنےسےمعذرت کرلی ، آئی جی پنجاب کا کہنا ہے کہ پرویز الہٰی کے وزیراعلیٰ منتخب ہونے پر کام کرنا مشکل ہوجائے گا۔ تفصیلات کے مطابق آئی جی پنجاب
راؤ سردار علی نے مزید کام کرنے سے معذرت کرلی، جس کے بعد آئی جی پنجاب راؤ سردار علی کو کل تبدیل کئے جانے کا امکان ہے۔ نئے آئی جی کے لئے اے ڈی خواجہ ، فیصل شاہکار اور انعام غنی کے نام
سامنے آگئے ہیں۔ ذرائع نے کہا ہے کہ آئی جی پنجاب راؤسردار نے وزیراعلیٰ پنجاب کو وفاق تبادلے کی درخواست دی ، جس کے بعد وزیراعلیٰ پنجاب نے راؤ سردار کو تبدیل کرنےسے متعلق وفاق سے
مشورہ کیا۔ ذرائع کے مطابق آئی جی پنجاب نے درخواست میں کہا تھا کہ پرویز الہٰی کے وزیراعلیٰ منتخب ہونے پر کام کرنا مشکل ہوجائے گا، میرٹ پرسب کام کئے مگرنہیں چاہتا کوئی نیا معاملہ کھڑا ہو۔ ذرائع
نے بتایا کہ حمزہ شہباز کا کہنا ہے کہ آپ نے ہمیشہ میرٹ اور شفافیت پر فیصلے کئے ہم آپکی خدمات کو سراہتے ہیں۔ خیال رہے پرویزالہٰی نے اسمبلی میں پولیس ایکشن پر آئی جی کیخلاف کارروائی کا عندیہ دیا تھا۔